Açıklama
بو کیتابدا ایراندا باش وئرن سو بؤحرانی حاشیه-مرکز مناسبتلرینده اینجهلنمیشدیر. دئمک حاشیه مرکز مناسبتلری بیر طرفدن، حاکمیتین ایلییینهجن ایشلهین فساد و ثمرهسیزلیک (ناکارآمدی) ایسه دیگر طرفدن، سو بؤحرانینی گونو-گوندن شیددتلندیریب، ایران اهالیسینی و اؤلکهنین گلهجهیینی فلاکته ساری سوروکلهییر. بونونلا دا باشاردیقجا بو بؤحرانین کؤکلرینی آراشدیرماغا چالیشدیق. چونکی هر هانسی بیر مسئلهنین کؤکلرینی آراشدیرمادیقدا، اونون گلهجهیی اوچون بیر چیخیش یولو دا تصور ائدیله بیلمز.
عمومیتجه مخاطبلر اوچون، خصوصی ایله سو بؤحرانی ایله تانیش اولمایانلاردان اؤترو؛ بیرینجی بؤلومده «قلوبال سو بؤحرانی» آدی آلتیندا؛ اینسان اوچون سویون اهمیتی و سوسوزلوغون ریسکی، تاریخ بویونجا سو مصرفینین گلیشمهسی، دونیادا و ایراندا سو وضعیتی کیمی عومومی موضوعلاری آچیقلاماغا چالیشمیشیق. ایکینجی بؤلومده ایراندا اهالینین آرتماسی ایله سو بؤحرانینین ایلگیسینه باخمیشیق. اوچونجو بؤلومده ده ایراندا مختلف سئکتورلاردا سویون ایشلهدیلمهسینی موضوع ائتمیشدیک. دئمهلی بیرینجی بؤلومده سو بؤحرانیندان عمومی بیر باخیش آچیسی سرگیلهییب، ایکینجی و اوچونجو بؤلومده ایسه، سو بؤحرانی و اونون عمومی وضعیتینی ایراندا ایزلهمکله سؤزوموزون آردینی توتموشوق.
دؤردونجو بؤلومدن سونرا ایرانین حاشیه-مرکز مناسبتلری ایله حاکیمیتین فیساد و ثمرهسیزلییینی هدفلهیرک، ایراندا سو بؤحرانینی دیگر 7 بؤلومده آچیقلاماغا چالیشمیشیق. دؤردونجو بؤلومده «بئجرمه مدلی و ایراندا چئوره عدالتسیزلییی» بحثه قویموشوق. بئجرمه مدلی نهدیر؟، بئجرمه مدلینی ائتکیلهین ان اؤنملی فاکتورلار نهلردیر؟، بئجرمه مدلی نه ایشه یاراییر؟، ایراندا بئجرمه مدلینین وضعتیتی و ایراندا بئجرمه مدلینین یوخلوغوندا چئوره عدالتسیزلییی کیمی آلت باشلیقلارلا دا بئجرمه مدلینین نه اولدوغو و نئجه ایراندا چئوره عدالتسیزلییینه تاثیر بوراخدیغینی آددیم-آددیم اینجهلهمیشیک.
بئشینجی بؤلومون عنوانی «گولخانا و چئوره عدالتسیزلییی»دیر. بو بؤلومده گولخانا حاققیندا عمومی تعریفلری وئریب، گولخانا اکینینین وضعیتیندن بحث ائتمیشیک. بوردا نظره آلدیغیمیز ان اؤنملی موضوع، گولخانا اکینینین سویون آز ایشلتمهسی و اقتصادی فایدالاریندان علاوه، مرکزی حاکمیت طرفیندن گولخانا اکینینین ایرانین مرکزی منطقهلرده یایغینلاشماسی ایله اونون حاشیه منطقهلرده قاباغینین آلینماسیدیر. آلتینجی بؤلوم «مکانیکلشدیرمهنین سووارما راندیمانینا تأثیری و سو بؤحرانینین کسکینلشمهسی» عنوانی ایله ایرانین کند تصرفاتیندا سووارما یوؤندملری ایله هر بیریسینین راندیمانینی بحثه قویموشدور. دئمهلی بئشینجی و آلتینجی بؤلوملرده ایرانین کند تصرفاتیندا سویون هدره گئتمهسی ایله سو بؤحرانینین اورتا گلیب کسینلشمهسینی بحثه قویموشوق.
«ایراندا سويون حؤضهلر آراسی ترانسفئری» آدلی یئددینجی بؤلومده، شیرین سویون و شور سویون دوزسوزلاشدیراراق؛ ایرانین حاشیه منطقهلریندن مرکز منطقهلرینه ترانسفئری اینجهلنمیشدیر. بو بؤلومده ایرانین حیاتا کئچیریلن و اؤیرنمه مرحلهسینده اولان سو ترانسفئری پروژهلرینی گؤزدن کئچیرمیشیک.
سککیزینجی بؤلوم «ایراندا داخیلی استعمارین سو بؤحرانینا تاثیری» آدی ایله ژورنالین اونورقا سومویو حساب ائدیله بیلر. نییهکی اوندان اؤنجه و اوندان سونرا قئید اولان مقالهلرین موضوعلارینی و یا داها دوغروسو ایرانین حاشیه-مرکز مناسبتلریندهکی باش وئرن سو بؤحرانینین جامع آنالیزیدیر. بو بؤلومده استعمار تاریخینین گلیشمهسی و آکادئمیسینلر طرفیندن فورموله ائدیلمهسی بوتون دئتایلاری ایله دانیشیلدیقدان سونرا، گونئی آذربایجانین ایراندا داخیلی مستعمره اولوب-اولماماسی و داخیلی استعمارین نئجه ایرانداکی سو بؤحرانینا تاثیرینی تحلیل ائدیر.
دوققوزونجو بؤلومون عنوانی «ایران آذربایجانیندا سو بؤحرانی و اوشاق ائولیلییینین آرتماسی»دیر. بو و بوندان سونراکی اولان اونونجو بؤلومده، سو بؤحرانینین آذربایجانلی قادینلارین یاشاملارینا بوراخدیغی تاثیرلردن بحث ائدیلیر. چوخونلوقلا گلیرلری کند تصرفاتیندان الده ائدیلن آذربایجان کیمی دالی ساخلانیلمیش منطقهده، گونو-گوندن کسکینلهشن سو بؤحرانی؛ عایلهلرین کئچینهجکلرینی چتینلشدیرمکدهدیر. قیزلارین ارکن یاشدا اره وئریلیب ده سیفرانین باشیندان بیریسینین آزالماسی، بو بؤحرانین نتیجهلریندن بیریسیدیر. بو بؤلومده سون اون بئش ایلده اوشاق یاشدا ائولندیریلمیش قیزلارین آمارلاری، سو قایناقلاری و کند تصرفاتی آمارلاری ایله توتدوشدورولموشدور. اونونجو بؤلومده ده «ایران آذربایجانیندا قادینلار و سو اعتراضلاری» تحلیل ائدیلمیشدیر.
Değerlendirmeler
Henüz değerlendirme yapılmadı.